Schuberten ‘Amuarraina’ kinteto ezagunarekin amaituko da larunbat honetan Miramongo Matinéeen 25/26 Denboraldia
Miramon Ensemblek Euskadiko Orkestraren ganbera-musika zikloa itxiko du errepertorioko obra entzutetsuenetako batekin larunbat honetan, ekainak 6, 11:00etan, Miramonen. Sarrerak salgai daude 11 eurotan.
Larunbat honetan, ekainak 6, 11:00etan, Euskadiko Orkestraren ganbera-musika ziklo Miramongo Matinéeen Denboraldiko azken hitzordua izango da, Miramon Ensemble taldeak eskainiko duena, ‘Uraren islak’ izenburupean. Taldeak bost interprete ditu, eta horietako lau Euskadiko Orkestraren kideak dira: Larraitz Oiartzabal (biolina), Delphine Dupuy (biola), Juan Ignacio Emme (biolontxeloa) eta Mehmet Sönmez (kontrabaxua). Itxaso Sainz de la Mazak osatuko du taldea pianoan.
Azken kontzertu honetan ganbera-musikaren maisu handienetako eta historiako konpositore emankorrenetako bati omenaldia egingo diogu: Franz Schubert. Miramon Ensemblek ganbera-errepertorioko obrarik ospetsu eta maitatuenetako bat interpretatuko du: Pianodun kintetoa la maiorrean, D.667, mundu osoan Amuarraina bezala ezagutzen dena.
Lan honen jatorria Schubertek 1817an Christian Friedrich Daniel Schubarten poema baten gainean konposatutako Die Forelle (‘Amuarraina’) liedean dago. Abestiak berehala lortu zuen ospe handia, bere freskotasun melodikoari eta konpositoreak uraren mugimendua eta amuarrainaren bizitasuna gogora ekartzeko duen fintasunari esker. Pieza horrekin liluratuta, Sylvester Paumgartner mezenas eta biolontxelojole amateurrak ganbera-lan bat enkargatu zion Schuberti, hain ezaguna zen tema hura sartzeko.
Horrela sortu zen 1819an kinteto hau, formazio ezohikorako idatzia —biolina, biola, biolontxeloa, kontrabaxua eta pianoa—, obrari sonoritate argitsu eta gardena ematen diona. Liedaren tema ospetsua eraldatuta agertzen da laugarren mugimenduan, bariazio-joko fin bihurtuta. 1829an hil ondoren argitaratua, Amuarraina ganbera-musika osoko konposizio miretsi eta enblematikoenetako bat bezala finkatu da.
Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, orkestraren egoitzako leihatilan bertan ere eros ahal izango dira kontzertuaren egunean, leku libreak geratzen badira.
Miramongo Matinéetara eroso joateko, Euskadiko Orkestrak doako autobus-zerbitzua eskainiko du. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.
Miramongo Matinéeek Kutxa Fundazioaren babesa dute sortu zirenetik.
