H.E.C. Laukoteak ‘Alemaniarrak don’ kontzertua eskainiko du larunbat honetako Miramongo Matinéean

Larunbat honetan, martxoak 9, 11:00etan, Miramongo Auditoriumean, Miramongo Matinéeak 18/19 Denboraldiko hamaikagarren hitzordura iritsiko dira H.E.C. Laukotearen ‘Alemaniarrak don’ izeneko kontzertuarekin. Taldea honako musikariek osatuko dute: Maialen Rezabal (biolina), Monika Mazur (biola) eta Beatriz Linares (biolontxeloa), hirurak Euskadiko Orkestra Sinfonikoaren kideak, eta Amaia Zipitria (pianoa).

Kontzertua Ludwig Van Beethovenen 3. kuartetoa pianoarekin obrarekin hasiko da. ‘Allegro vivace’ bizkor batekin abiatzen da kuartetoa, eta arintasunez errimatutako lehen motibo jostagarri batek bigarren motibo atsegin batera garamatza azkar batean. Erdiko ‘Adagio con espressione’ mugimendua askotariko konposizioa da, erdiko ahotsean eskainia, melodikoki oso sotila, xumea, eta ia meditaziora bultzatzen duena. ‘Rondo-allegro’ gozo batek ematen dio obrari amaiera sinpletasun alai moduko batekin.

Matinéearen bigarren eta azken obra Richard Straussen Kuartetoa pianoarekin izango da. Bigarren sinfonia amaitu berritan, Richard Straussek hogei urte baino ez zituenean idatzi zuen obra hau Berlingo Tonkünstlervereinak antolatutako lehiaketa batera aurkezteko. Lehen saria eskuratu ostean, 1885ean aurkeztu zuen obra jendaurrean Meiningenen, eta Strauss aritu zen pianoan estreinaldi horretan. Strauss bera harrituta geratu zen obraren arrakasta ikustean, bere ustetan ez baitzen, inola ere, “partitura atsegin eta erakargarria”. Eta, egia esan, obraren harrera ona izan zen arren, kuarteto hau ez da sarri interpretatzen harrezkeroztik. Obraren dimentsioak izugarriak dira, eta bere egikera Straussen beraren Bigarren sinfoniarena bezain konbentzionala da. Lehen notetatik nabari daiteke Johannes Brahmsek idatzitako kuartetoei egiten dion omenaldi argia.

Sarrera solteak (7€) salgai daude euskadikoorkestra.eus webgunean eta Kursaal Auditoriumeko leihatilan. Gainera, leku librerik geratuko balitz, Orkestraren egoitzako leihatilan bertan eros ahal izango lirateke kontzertuaren egunean.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio bertaratu nahi duen orori. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

More information