Larunbat honetan 11:00etan ‘Euskadiko Orkestra Martxan!’ ekimeneko bosgarren kontzertua emango du ETB2k
Ekimenak ibilbidearen erdia gainditu du dagoeneko, eta sorta osatzen duten zortzi kontzertuetatik lau eman dituzte telebistan. Kontzertu guztiak orkestraren Miramongo egoitzan grabatu dira, talde murriztuarekin eta indarrean dauden osasun-neurriak betez.
Richard Straussen 'Metamorphosen' eta Mozarten '41. Sinfonia, Jupiter' lanek osatzen dute bosgarren kontzertu honetako programa.
Maiatzaren erdialdean iragarri genuen Euskadiko Orkestra Estatuko lehen orkestra izan zela, baita Europako bakanetakoa ere, martxan jarri eta agertokian berriro biltzen. Robert Treviño zuzendari titularraren gidaritzapean elkartu zen, eta egungo egoerara egokitutako lehen proiektu bat martxan jartzeko helburuarekin: Euskadiko Orkestra Martxan!, zortzi kontzertuko denboraldi txikia, ETB ematen ari dena, eta ondoren orkestraren YouTube kanalean ere gozatu ahal dena.
Berrogeita hamar bat musikariko formazio murriztuarekin, eta betiere egungo egoerak eskatzen dituen segurtasun-neurriak zorrotz betez, orkestrak zortzi kontzertu horiek bere Miramongo egoitzan entseatu eta grabatu zituen maiatz erdialdea eta ekain erdialdea bitartean. Sortako bosgarren kontzertua larunbat honetan, ekainak 27, 11:00etan, eskainiko du ETB2k. Richard Straussen Metamorphosen eta Mozarten 41. Sinfonia, ‘Jupiter’ bezala ezagunagoa dena, dira programako errepertorioa osatuko duten obrak.
Lau kontzertu ikusgai YouTuben
Kontzertu horiek guztiak, maiatzaren 30etik uztailaren 18ra bitartean ETB2n 11:00etan emateaz gain, orkestraren YouTubeko kanalean daude ikusgai telebistako emanaldien ondoren. Dagoeneko eskuragarri daude orain arte emandako lau kontzertuak, baita bosgarren kontzertuaren estreinaldirako esteka ere:
- Euskadiko Orkestra Martxan! #1: Agur Jaunak / Mendelssohn, ‘3. Sinfonia’
- Euskadiko Orkestra Martxan! #2: Haydn, ’49. Sinfonia’ / Mendelssohn, ‘1. Sinfonia’
- Euskadiko Orkestra Martxan! #3: Mozart, ’31. Sinfonia’ / Mendelssohn, ‘4. Sinfonia’
- Euskadiko Orkestra Martxan! #4: Brahms, ‘1. Serenata’
- Euskadiko Orkestra Martxan! #5: R. Strauss, ‘Metamorphosen’ / Mozart, ’41. Sinfonia’
