Euskadiko Orkestrak 19/20 Denboraldiko azken kontzertuak bertan behera utzi ditu

Koronabirusaren krisia hasi zenetik eta hari lotuta etorri den itxialdi honetan egin duen modu berean, erakunde publikoen esana jarraituz, Euskadiko Orkestrak 19/20 Denboraldi amaiera bitarte (ekainaren 4ra arte, alegia) programatutako kontzertu guztiak bertan behera uztea erabaki du.

Koronabirusak Denboraldian izan duen eragina handia izan da, eta kontzertu ugari bertan behera uztea izan da ondorio nabarmenena: Abonu Denboraldiko 25, Miramongoko Matinéeetako 6, hainbat Musika Familian kontzertu eta Musikaste bezalako beste ekintza batzuk. Galdutako kontzertu hauen zenbatekoa itzuli egingo die orkestrak abonatuei.

#EuskadikoOrkestraEtxean ekimenaren arrakasta

Ohiko kontzertuen faltan, orkestrak #EuskadikoOrkestraEtxean izeneko ekimenean jarri ditu indarrak eta horren baitan askotariko edukiak eskaini ditu plataforma digitalen bidez. Esate baterako, aterki horren pean, Euskadiko Orkestrak musikariek etxetik egindako bideoak partekatu ditu, eta bereziki arrakastatsua izan da horien artean ‘Agur Jaunak eta Andreak’ abestiaren bertsioa, apirilaren 8an aurkeztutakoa, eta 50 bat musikariren parte-hartzea izan zuena. Egitasmo honen barruan Izarorekin grabatutako hiru bideoklip ere aurkeztu dira (‘Errefuxiatuena’, ‘Koilarak’ y ‘Tu escala de grises’), Fernando Velázquezek zuzendutakoak, eta dozenaka mila aldiz ikusi dira sare sozialetan. Hori guztia osatzeko beste multimedia eduki batzuk ere zabaldu ditu orkestrak: Denboraldiaren inaugurazioan interpretatutako obrak hedatu ditu Youtuberen bidez, zuzenean grabatutako hainbat kontzertu jarri ditu eskuragai webgunean eta haurrentzat grabatutako ikuskizunak ere aireratu ditu, besteak beste.

Ildo honi jarraituz, Euskadiko Orkestrak epe laburrean ekimen berriak aurkezteko ditu musika publikoari helarazteko helburuarekin, beste formatu eta bide batzuk erabiliz.

20/21 Denboraldia

2020/2021 Denboraldiari dagokionez, aipatzekoa da diseinatuta dagoela dagoeneko eta laster aurkeztuko dela, datozen asteetan. Osasun- eta segurtasun-jarraibideen zain geratu beharko dugu bitartean, Denboraldiari nola aurre egin erabakitzeko.