"Tintadun Musika", 1850tik 2016ra euskal musika argitalpenen estetika aztertzen duen erakusketa

Abenduaren 1etik urtarrilaren 7ra, "Tintadun Musika" erakusketa ikusgai dago Donostiako Koldo Mitxelena Kulturuneko liburutegian. Euskadiko Orkestra lankide duen erakusketa honen xedea da 1850tik 2016ra euskal musika-edizioen estetikak bizitako bilakaera aztertzea eta Orkestrak utzitako bi partitura izango dira ikusgai: batetik, 1925. urte inguruan Editorial Música Vasca argitaletxeak plazaratutako edizio bat, Peña y Goñiren Donostia: pasodoble vasco eta Marcelino Amenabarren Arraunlariak obrak biltzen dituena; eta, bestetik, 2009an Tolosako Oihu hau argitaldariak kaleratutako Javier Bello-Porturen El carnaval de Lanz lanaren partitura. Orkestrako kide Mario Telentik bisita gidatu bat egin du gainera.

"Tintadun Musika" II. Liburuari buruzko Topaketen programazioaren baitan antolatu da. Azaroaren 28an abiatu ziren eta abenduaren 20ra bitartean hainbat erakusketa, artista liburuen erakustaldiak, haur zein helduentzako tailerrak, solasaldiak, hitzaldiak, errezitalak eta proiekzioak izango dira Donostiako zenbait gunetan.

II. Topaketa hauen antolatzaileak dira arteliburu21 elkarte artistiko nahiz kulturala, San Telmo Museoa, Koldo Mitxelena Kulturunea, Tabakalera eta Arteko Taller. Jatorrizko proiektua arteliburu21 elkartearena da.