Tomás Aragüés Bernad konpositorearen omenezko kontzertua bere 80. urtebetetzean

Euskadiko Orkestra Sinfonikoak, Donostiako Orfeoiak, Andra Mari Abesbatzak, Easo Abesbatzak eta La Salle Anaidiak, beste hainbat erakunderen laguntzarekin, Tomás Aragüés Bernad konpositorearen omenez kontzertu bat antolatu du, hark 80 urte betetzen dituen honetan. Euskal musika garaikideko sortzaile emankorrenetakoa dugun honi merezitako omenaldia eta eskertza adierazteko eskainiko den kontzertua urriaren 22 ostegunean izango da, Donostiako Kursaal Auditorioan, arratsaldeko 20:00etan.

Eszenatokian aipatu lau erakundeak bilduko dira. Diego Martin Etxebarria eta José Antonio Sáinz Alfaroren zuzendaritzapean, Aragüés Bernad maisuaren Min eresia, Sinfonía versus ochenta obrako Te Deum eta Euskal Requiema interpretatuko dituzte, azken honetan Ainhoa Zubillaga, Xabier Anduaga eta Pablo Ruizen ahots bakarlariak lagun dituztela. Nabarmentzekoa da Euskal Requiemaren bietako ahotsen abesbatzarako bertsioa estreinatuko dela eta Sinfonía versus ochenta, bere azken sinfoniaren azken zatia den Te Deum-aren erabateko estreinaldia izango dela. Tomás Aragüés Bernad berak bere obra nabarmen hauen interpretazioaz gozatzeko aukera izango du.

Tomás Aragüés Bernad Albalate del Arzobispon, Teruelen jaio zen 1935ean eta bost urterekin Barakaldora aldatu zen bere familiarekin. Beranduago, 1973an Donostian finkatu zuen bere bizilekua. Beraz, bizitza osoan izan du Euskal Herriarekiko lotura estua. Bere ibilbide luzean zehar, ekarpen nabarmena egina du euskal musikaren alorrean, sortzaile, moldatzaile zein zuzendari gisa eta harreman emankorra izan du, eta egun ere badu, gure herriko musika alorreko eta orokorrean kultur erakunde ugarirekin.

Sarrerak, dagoeneko eskuragarri Kursaaleko leihatilan. Omenaldi-kontzertu honetarako sarrerak doakoak dira eta gaurtik eskuragarri daude Kursaaleko leihatilan, asteartetik larunbatera, 11:30etatik 13:30etara eta 17:00etatik 20:00etara (2 sarrera pertsonako).

More information