José Mª Usandizagaren (1887-1915) "La Llama" operaren berrestreinaldia kontzertu bertsioan

Musika-ekitaldi bikaina: Konpositorearen heriotzaren mendeurrena dela eta, Euskadiko Orkestra Sinfonikoa gogor saiatu da eta jende askoren laguntza izan du José Mª Usandizagaren "La Llama" opera berreskuratzeko. Opera honetaz gain, egileak "Mendi Mendiyan" eta "Las Golondrinas" ezagunagoak ere idatzi zituen. "La Llama" opera berreskuratzeko, partituraren edizio-lan handia egin da, Juan José Ocónen zuzendaritzapean. Berak zuzenduko du lan honen kontzertu-bertsioa Euskadiko Orkestraren Abonu Denboraldian. Emanaldi honetan -bere emaitza mundu-mailan egindako lan honen lehen grabazio gisa erregistratuko da- euskal artista garrantzitsuek eta Andra Mari Abesbatzak hartuko dute parte.

Bere heriotza goiztiarraren (28 urte) mendeurrenean konpositore donostiarraren figura berreskuratzen da. Aurtengo denboraldirako programatutako ekitaldi guztien artean "La Llama" operaren berrestreinaldia kontzertu-bertsioan azpimarra daiteke. Opera hau "Mendi-Mendiyan" eta "Las Golondrinas" izenekoen ondoren idatzi zuen. Xehetasun txiki batzuen faltan, "La Llama" opera 1915ean amaitu zuen, baina ez zen hiru urte beranduago arte estreinatu.

"La Llama" Donostiako Victoria Eugenia Antzokian estreinatu zen 1918ko urtarrilaren 30ean. Operak arrakasta handia izan zuen kritikarien artean, baita oihartzun handiko musika-ekitaldi honetara Madrildik etorritakoen artean ere. José Mª Usandizagaren "Las Golondrinas" lanak arrakasta handia lortu zuen hiru urte lehenago Madrilen.

Duela hiru urte, eta José Mª Usandizagaren heriotzaren mendeurrenari begira, Euskadiko Orkestra Sinfonikoak buru-belarri opera hau berreskuratzeko lanari ekitea erabaki zuen. Lan hori, estreinaldiko kontzertua zuzentzearekin batera, Juan José Ocón orkestra-zuzendariari eskatu zitzaion. Bestalde, Manuel Cabrera musika-kritikariak libretoa orraztu du. Proiektu hau gauzatzeko Gipuzkoako Foru Aldundiaren eta Donostiako Udalaren laguntza jaso dugu.

Lan honen berrestreinaldia martxoaren 16tik 24ra egingo da, Euskadiko Orkestra Sinfonikoaren Abonu Denboraldiaren barruan eta bere ohiko lau ziklo sinfonikoetan (Gasteiz, Bilbo, Donostia eta Iruña). Estreinaldiaz gain, opera lehen aldiz grabatuko da. Hortaz, gerorako erregistratua geratuko da eta konpositorearen musika-ondarea zabalduko da.

Euskadiko Orkestrak sustatutako eta kudeatutako lan garrantzitsu honek berriro ere erakusten digu erakunde honek euskal sormena ezagutzera emateko duen interesa eta ardura. Ahalegin honen adibide argia Euskal Konpositoreen Bilduma da -baztertu ezin den erreferentea-. Bilduma honen 1998ko bigarren bolumenean José Mª Usandizagaren obra sinfonikoa jasotzen da.

More information