Gabon kanta tradizionalak berriztaturik, Landarbaso Abesbatza eta Kaabestri taldearen eskutik

Gabon kanta tradizionalak, baina modu arin eta berriztatzailean. Gabonetan betidanik entzun izan ditugun doinuak lehenbiziko aldiz entzungo bagenitu bezala entzutea, hori da Miramongo Matinéeak zikloaren baitan abenduaren 14 larunbatean eskainiko duten emanaldiaren bidez Iñaki Tolaretxipik zuzentzen duen Landarbaso Abesbatzak eta Kaabestri ganbera taldeak lortu nahi dutena. Eta horretarako Dan Forrest (New York, 1978) estatubatuar konpositorearen moldaketez baliatu dira.

Landarbaso Abesbatza 1991 urtearen amaiera aldera sortu zen eta egun 44 kidek osatzen dute. Abesbatzak errepertorio oso anitza lantzen du, garai eta estilo ezberdinetako obra profano zein erlijiosoak interpretatzen dituelarik ; gainera euskal folklorearen inguruan sormen eta harmonizazio lana ere burutzen du. Honela, lan ildo berriak ahalbidetu ditu, bai abesbatzarako eta baita, orokorrean, musika panoramarako ere. Urte hauetan zehar, Landarbaso ziklo, lehiaketa eta kontzertu ezberdinetan aritu da Espainiako probintzia ezberdinetan eta 2001. urtetik aurrera nazioarteko abesbatza lehiaketa ugaritan aritu da, sari nabarmenak eskuratu dituelarik. Sortu zenetik, Iñaki Tolaretxipi du zuzendari ; musikari hau Gipuzkoako zuzendari gailenetakoen artean dugu egun.

Kaabestri Ensemble taldeak musika errepertorio oro jorratzen du, barrokotik hasi eta egungo musikaraino. Berau osatzen duten musikari gehienak Euskadiko Orkestra Sinfonikoko kideak dira. Kaabestri Euskadiko toki ugaritan aritu da eta grabaketa ezberdinak burutu ditu. Miramongo Matinéetan «Biolin gorria»ren soinu banda estreinatu zuen Espainia mailan, Raphael Christ biolinjotzailea lankide izan zuelarik, eta jaialdi ezberdinetan ere aritu da ; esaterako, Glen Hansardekin batera izan zen BBK Live jaialdiaren baitan. Ongintzako elkarteekin lankidetzan ere aritzen da, horien artean Harri Beltza elkartearekin. Taldearen kalitatea entzulego zein kritikak goraipatu dute. Burututako egitasmoen artean, Pirritx, Porrotx eta Marimotots pailazoen 25. urteurrena ospatzeko Xabier Zabalak moldatutako kantak bilduz kaleratutako diskoaren grabaketa, Miramongo Matinéetarako Andoni Mercero biolinjotzailearekin prestatutako kontzertua edo «Urte berri on, amona» filmerako eta «Bertsolari» dokumentalerako soinu banden grabaketak daude.

Kontzertu honetarako sarrera solteek 7€ko prezio bakarra dute eta kontzertuaren egunean Orkestraren egoitzako leihatilan erosi ahalko dira.