Kontzertu sinfonikoak, abesbatzarako musika, ganberakoa, nazioarteko bakarlarien errezitalak eta dantza emanaldiak 7€-tan

Irailaren 28tik 2014ko maiatzaren 31ra bitartean, Euskadiko Orkestra Sinfonikoaren egoitzako auditorioa Miramongo Matinéen erdigune izango da berriz ere. Euskadiko Orkestraren ganbera zikloaren hogeita bigarren denboraldia izango da.

16 kontzertu, ezin konta ahala argudio. Ziklo bat osatzen dute, baina Denboraldia osatzen duten 16 emanaldietako bakoitzak berezko izaera du eta ikuspegi ezberdina du abiapuntu. Guztietan topatuko dugu musika. Musika klasikoa, bai horixe, askotan musikari gazteek interpretatua eta, zergatik ez, gazteei ere zuzendua; baina barrokoa ere izango dugu, rocka, musika sinfonikoa edo dantza lagun duen musika; nazioarte mailako bakarlari Measha Brueggergosman, Alexandre Da Costa, Miloš edo Benjamin Grosvenor gure inguruko taldeekin batera, esaterako Landarbaso Abesbatza edo Dantzaz Konpainia; eta Euskadiko Orkestra osoarekin edo, Kaabestri bezala, Orkestrako kideek osatutako taldeekin. 16 kontzertu eta ezin konta ahala argudio larunbat goizean Miramonera hurbiltzeko. 

Abonuak jada salgai, sarrera solteak irailaren 23tik aurrera. Denboraldia osatzen duten 16 kontzertuetarako abonuak 79€ko prezioa du eta 61€koa tarifa bereziko onuradunentzat (ikus programaziodun pdfa) eta jada eskuragarri dago Orkestraren bulegoetako telefonora deituz (943 01 32 32) edo inprimaki hau betez. Sarrera solteek, aldiz, 7€ko prezio bakarra dute eta irailaren 23an jarriko dira salgai. www.kutxabank.es webgunean, Kursaal Auditorioko leihatilan EOS edo Kursaal Fundazioaren emanaldi egunetan eta, aforo librerik balego, Orkestraren egoitzako leihatilan bertan erosi ahalko dira.

Miramonera autobusez. Euskadiko Orkestrak Matinéetako publikoaren esku doan jartzen duen autobus zerbitzua da Miramongo egoitzara heltzeko biderik erraz eta erosoena. Matinéea dagoen egunetan bakarrik erabilgarri den garraiobide hau 10:25etan abiatzen da Gipuzkoa Plaza 4tik eta geldialdiak egiten ditu Antso Jakituna 18 eta Madrilgo Hiribideko 34ean.

"Brahms bakarrik" kontzertuak irekiko du denboraldia irailaren 28an. Euskadiko Orkestraren baitan sortutako Ensemble Dionysus taldeak Johannes Brahmsen Pianorako kintetoa fa minorrean, opus 34 izango du hizpide. Baina partitura hau bere jatorrizko bertsioan berreskuratu du Dionysos Ensemble taldeak, bi biolontxelodun hari boskoterako, alegia, Anssi Karttunen (1960) finlandiar biolontxelojotzailearen eskutik. Ensemble Dionysus Irene eta Izaskun Echeveste, biolinak; Delphine Dupuy, biola; eta Juan Ignacio Emme eta Jon Larraz, biolontxeloak, osatzen dute.

More information