Soinuzko minimalismoa: hari-laukote batek Michael Nyman eta Philip Glass-en musikaz emango die hasiera Miramongo Matinéei
Larunbat honetan, hilak 18, hasiko da Euskadiko Orkestrak Miramonen duen egoitzan Miramongo Matinéen hemeretzigarren denboraldia. 1997an Orkestrako musikarien jarduera askotaratzeko eta gainera genero ugariz osatutako kalitatezko musikazko aukera eskaintzeko sortutako ziklo hau "Etengabeko mugimenduan" aurkezten zaigu oraingoan. Eta mugimendu honen erakusle, Miramongo Matinée-en programazioa osatzen duten estilo anitzen erakusle, Minimalismoa eta "gutxiago gehiago da" bere leloa gailenduko dira denboraldiko lehenbiziko emanaldian.
Musika minimalista Estatu Batuetan sortu zen joan zen mendeko 60. hamarkadan. Underground mugimendu gisa jaio zena XX.mendeko musika esperimentalaren generorik garrantzizkoena bilakatu arte garatu zen. Michael Nyman eta Philip Glass, Minimal laukoteak kontzertu honetarako aukeratutako konpositoreak, musika minimalistaren izen nabarmenetakoak dira. Jane Campion-en "Pianoa" filmaren soinu-bandaren egile den Michael Nymanen (Londres, 1944) lana izan zen "minimalista"-tzat jo zen lehenengoa. Bere ekoizpenaren erakusgarri, Don Giovanni in Re laburra eta 3. Hari-kuartetoa izango dira entzungai. Philip Glassek (Baltimore 1937) nahiago du bere buruaz egitura errepikakorrez osatutako musika sortzen duen konpositore gisa aritu eta formatu askotariko musikaren sortzaile da: opera, antzerki esperimentalerako musika, filamatarako soinu-bandak (Stephen Daldry-ren "Orduak" luzemetraiarena, adibidez) edo pop zein rock musikako artistekin lankidetzak, David Bowie-rekin, esaterako. Minimal laukoteak bere 3. Hari-kuartetoa, "Mishima" interpretatuko du.
Minimal hari-laukotea duela urte batzuk elkarrekin jotzen duten lau lagunek osatzen dute. Izan ere, hiru Euskadiko Orkestra Sinfonikoko kide dira. Hertsiki klasikoa den errepertorioa lantzeaz gain, garai zein estilo ezberdinak uztartzen saiatzen dira, beren musika-ibilbidea eta, bide batez, bizitza bera aberasteko asmoz. Kontzertu honetan, Minimal laukoteak, minimalismoaren postulatuei jarraiki, norbere esentziarekin bat egitea ahalbidetuko duen denboraz kanpoko espazioa sortu nahi du, apaindurarik gabe.
Denboraldiko kontzertu guztietarako sarrerak Servikutxa, Telekutxa (943 00 12 00), www.kutxa.net eta www.euskadikoorkestra.es helbideetan eskura daitezke, eta baita Egoitzaren leihatilan, kontzertu egunean 10:30etatik aurrera. Halaber, doako autobus zerbitzua dago Miramongo Egoitzera etortzeko, 10:25etan Gipuzkoako Plazako 4.zenbakitik atera eta Antso Jakituna Hiribideko 18. zkian eta Madrilgo Hiribideko 34.ean geldialdiak egiten dituelarik.
2010/2011 Denboraldiko lehenbiziko Matinéea
2010eko irailaren 18an, Euskadiko Orkestraren Egoitza, Miramon. 11.00etan
Minimalismoa
Hari laukotea
Egitaraua
Michael Nyman (1944-)
Don Giovanni in Re [3']
3. Hari-kuartetoa [16']
Philip Glass (1937-)
3. Hari-kuartetoa, "Mishima" [18']
Maialen Rezabal*, Raquel Cortinas* biolinak
Asier Arabolaza biola
Jon Larraz* biolontxeloa
*EOSeko kidea
