Belharra zortzikotea izango da larunbat honetako Miramongo Matinéearen protagonista
Euskadiko Orkestraren zortzi musikariz osatzen den taldeak Dvorak eta Françaixen obrak interpretatuko ditu larunbat honetan, otsailak 24, 11:00etan, Miramonen. Sarrerak salgai daude 11 eurotan.
Larunbat honetan, otsailak 24, 11:00etan, Euskadiko Orkestraren ganbera-musika ziklo Miramongo Matinéeen Denboraldiko hurrengo hitzordua izango da. Bertan, Belharra taldeak ‘Erromantizismo modernoa’ izeneko kontzertua eskainiko du. Taldea orkestrako zortzi kidek osatzen dute: Anne-Marie Harmat (biolina), Itziar Prieto (biolina), Natacha Dupuy-Scordamaglia (biola), Pascale Michaud (biolontxeloa), Mehmet Sonmez (kontrabaxua), Sara Zufiaurre (klarinetea), Anne Charlotte Lacroix (fagota) eta Marcos Cruz Pardeiro (tronpa).
Belharrak Miramongo Matinée berri hau Antonin Dvoraken Harirako 2. Kintetoarekin hasiko du. Obra honekin Wagner eta Alemaniako Erromantikoen eraginetik urruntzen hasi zen, bere obran nonahikoa baitzen, eta txekiar inspirazio nazionalera itzuli zen. Obra 1875ean konposatu zuen ganbera-musikako lehiaketa baterako, Pragako Zirkulu Artistikoa erakundeak babestua. Epaimahaiak saria eman zion “bereizketa tematikoagatik, konposizio polifonikoan trebetasun teknikoa erakusteagatik eta forma menperatzeagatik”, baita “instrumentuak ondo ezagutzeagatik” ere. Jatorrizko lanak bost mugimendu bazituen ere, Dvorakek Intermezzo izeneko bigarren mugimendua kendu zuen geroago, obra luzeegia eta motelegia izan ez zedin. Lau mugimenduko lan gisa, behin betiko bertsioan, 1888an argitaratu zuen Simrockek.
Bigarren zatian, 1912an jaiotako eta normalean haizezko instrumentuetarako konposatu ohi zuen Jean Françaix konpositore frantziarraren obra bat entzungo da. Klasizismo xarmangarria duela esan ohi da, baita idazkera fin eta dotorea duela ere. Francis Poulenc bere lagunak bezala, musika “gozatzeko” helburuarekin idazten zuen. Kontzertu honetan entzungo den Klarinete, tronpa, fagot, bi biolin, biola, biolontxelo eta kontrabaxurako oktetoa 1972an konposatu zuen Willi Boskovskiren enkarguz. Boskovski urte askoan Vienako Filarmonikako kontzertinoa izan zen eta orkestraren Urteberriko Kontzertuetako liderra ere bai 80ko hamarkadaren hasierara arte. Boskovski Vienako Zortzikotearen sortzailea ere izan zen, eta ganbera-talde honentzat eskatu zuen obra hau. Françaixek “Franz Schuberten memoriari” eskaini zion oktetoa.
Sarrera solteak (11€) salgai daude euskadikoorkestra.eus webgunean eta Kursaal Auditoriumeko leihatilan. Gainera, orkestraren egoitzako leihatilan bertan ere eros ahal izango dira kontzertuaren egunean, leku libreak geratzen badira.
Miramongo Matinéetara eroso joateko, Euskadiko Orkestrak doako autobus-zerbitzua eskainiko du. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.
Miramongo Matinéeek Kutxa Fundazioaren babesa dute sortu zirenetik.
Concerts & Tickets January
