Varvara pianojole moskutarrak Euskadiko Orkestraren Abonu Denboraldian debutatu berri du birtuosismoaren eta sakontasunaren arteko oreka ezin hobea eskatzen duen obra bat interpretatzen: Bela Bartoken Pianorako 3. kontzertua. Estreinaldi horren ostean, Euskal Herrira egin duen bisita hau amaitzeko larunbat honetako Miramongo Matinéea eskainiko du, otsailak 12, 11:00etan, orkestraren egoitzan. Varvarak 2012an egin zuen jauzi nazioartera, Zuricheko Geza Anda lehiaketa irabazi ondoren, eta errepertorioko obra handiak jo izan ditu Inbal, Gergiev, Zinman, Vasary eta beste hainbat zuzendari prestigiodunekin batera.

Kontzertu honetarako Johann Sebastian Bachen Goldberg bariazioak aukeratu ditu, zeinaren tituluak Johann Gottlieb Goldberg klabezinjoleari egiten dion erreferentzia, Bachen ikasle izandakoa eta obra hau lehen aldiz interpretatu zuena. Goldbergek Kayserling kondearentzat lan egiten zuen, Dresdengo enbaxadore errusiarrarentzat, eta Bachen miresle eta nolabait babesle izan zen. Kondea lo egin ezinik egoten zen, eta sarritan dei egiten zion bere klabezinjoleari gau osoan beretzat jo zezan. Leipzigera egindako bidaia batean kondeak Bachi proposatu zion aldi berean goxoak eta alaiak ziren pieza batzuk idazteko, entretenimendu moduan. Eta Kayserlingen insomnio hori da maisulan zoragarri honen jatorria.

Goldberg bariazioak aria izeneko tema bakar batez, hogeita hamar bariazioz eta aria da capo batez osatzen dira. Horiek guztiak lotzen dituena ez da melodia arrunt bat, baizik eta bariazio harmonikoen atzealde bat, zeinen objektua baxu-lerroa baita. Melodiak aldatzen dira, baina beti dago tema konstante baten azpian.

Otsailaren 14ra arte edukiera-murrizketak daudenez, ez da Matinée honetarako sarreren salmentarik izango.

Miramongo Matinéetara eroso joateko, Euskadiko Orkestrak doako autobus-zerbitzua eskainiko dio kontzertua ikustera doazen abonatuei. 10:25ean abiatzen da autobusa Gipuzkoa Plaza 4tik eta geldialdiak egiten ditu Antso Jakituna 18an eta Madril Hiribidea 34an.

Miramongo Matinéeek Kutxa Fundazioaren babesa dute sortu zirenetik.

More information