Semyon Bychkovek, Juanjo Menak eta Robert Treviñok zuzenduko dute Euskadiko Orkestra abuztuan
Orkestrak parte-hartze hirukoitza izango du Musika Hamabostaldian (8, 15 eta 19), Santanderko Jaialdian (11) eta Euskalduna Jauregian Bilboko Aste Nagusian (22).
Semyon Bychkov izango da abuztuan Euskadiko Orkestraren gidaritza hartuko duen lehen orkestra zuzendaria.
Euskadiko Orkestra izan zen maiatzaren erdialdean berriro ekin zion Estatuko lehen orkestra. ETBren bidez zortzi kontzertu eskaini zituen, kultur jardueraren susperraldia argi eta garbi erakusteko. Orain, abuztuko maila handiko hilabetearekin eta bost kontzerturekin jarraitzen du, udan Euskadin eta Santanderren egingo diren hitzordu garrantzitsuenetan.
Hilaren 8an, orkestra lehena izango da Kursaal Auditorioko agertokira igotzen Musika Hamabostaldiaren edizio honetan, Beethovenen kontzertu monografikoa eskaintzeko, Semyon Bychkov orkestra-zuzendari ospetsuaren aginduetara. Robert Treviño orkestraren titularrak hartuko du lekukoa Xabier Anduaga tenore donostiarraren debuta aurkezteko, hilaren 15ean. Abeslari gazteak Rossini, Donizetti, Lara, eta Sorozabalen eta obrak interpretatuko ditu Euskadiko Orkestrarekin. Eta bukatzeko, Juanjo Menak zuzenduko du orkestraren hirugarren kontzertua, eta oraingo honetan Asier Polo txelojole bilbotarrarekin bakarlari gonbidatu gisa. Talde bikaina Haydn eta Beethoveni aurre egiteko.
Hiru kontzertu horiez gain, orkestrak Semyon Bychkovekin batera musika klasikoko jaialdi ospetsu eta beteranoetako batean hartuko du parte, Santanderrekoa, hain zuzen ere.
Hurrengo hitzordua hilaren 22an izango da Euskalduna Jauregian, Bilboko Aste Nagusian. Robert Treviñok erronka sinfonikotzat jotzen den lan bat zuzenduko du, Berliozen Fantastikoa. Kontzertu honetarako sarrerak Euskalduna Jauregiaren webgunean eta leihatilan eros daitezke.
Concerts & Tickets May
