Laboari Oihartzun: Soinu-Distirak
Euskadiko Orkestra Sinfonikoak euskal interpretetzaileentzat akuilu eta beren lanaren zabalkuntzarako plataforma izateko ahaleginean tinko darrai, sortu zenean finkatutako printzipioetako bati eutsiz. Horren harira, Euskadiko Orkestra berriz ere sorkuntza garaikidearekin eta Musikagileak elkartearekin bat eginda. Datorren ostiralean, hilak 12an, Euskadiko Orkestraren Miramongo egoitzan izango den kontzertuaren helburua "Laboari Oihartzun" proiektuari ahotsa jartzea izango da, Euskal Herriko Unibertsitatearen Mikel Laboa Katedrarekin lankidetzan, Laboak berak musika garaikidearekiko izandako lotura islatu asmoz. Kontzerturako sarrera doakoa izango da, aretoa bete arte.
Euskadiko Orkestra Sinfonikoak, Arturo Tamayok zuzenduta eta Easo Eskolaniako tipleak lankide dituela, eskainiko duen kontzertuko egitarauan, Peio Çabalette, Pascal Gaigne eta Felix Ibarrondoren obren eta Mikel Laboaren "Gernika" oinarri harturik Ramon Lazkanok egindako bertsio berri baten erabateko estreinaldiak izango dira. Obra guzti hauek Mikel Laboa Katedraren enkarguz izan dira idatziak (prentsa-ohar honi obra bakoitzaren inguruko iruzkin labur bat atxikitu diogu).
"Laboari Oihartzun" proiektua Euskal Herriko Unibertsitatearen eta Gipuzkoako Foru Aldunadiaren ekimenez Mikel Laboa Katedra sortu zenean bertan abiatu zen. Katedraren zuzendari Juan Kruz Igerabideren hitzetan, "Katedraren helburuetako bat lengoaia artistiko ezberdinen uztartzea da, izena ematen dion egile abeslariaren ibilbidea inspirazio-iturri hartuta. Mikel Laboaren ibilbide artistikoaren alderdi ezezagunenetako bat musika garaikiearekin izan zuen loturari dagokiona da. 1972 urtean John Cage-ek Iruñeako Topaketetan esku hartu izanak eragina izan zuen hainbat euskal musikarik musika garaikidearekiko izandako harremanean, horien artean Mikel Laboa bera. Honek bere bizitza artistiko osan zehar jarraitu zuen harreman honetan sakontzen. Lekeitioak dira Laboaren obran alor "garaikideena"; musika-sorkuntzaren ildo hau hainbat lanetan jarraitu zuen musikariak".
Kontzertu hau Euskadiko Orkestra Sinfonikoaren eta Musikagileak - Euskal Herriko Musikagileen Elkartearen arteko bigarren lankidetza dugu. 2012an Orkestraren Miramongo egoitzan elkarteko kideentzat eztabaida irekirako eta beren sokuntza lanaren zabalkuntzarako plataforma bilakatu zen jardunaldia izan zen. Topaketa egun orkestrarako idazteak suposatzen duen erronka hizpide izan zuen mahai-inguruarekin abiatu zen eta ondoren Euskadiko Orkestrak kontzertu bat eman zuen, Nacho de Paz maisuak zuzenduta.
