Euskadiko Orkestrak Brahmsen "Requiem germaniarra" interpretatuko du Abonu Denboraldian

Azaroaren 4tik 8ra, Euskadiko Orkestra Sinfonikoak Johannes Brahmsen "Requiem germaniarra" eramango du bere Abonu Denboraldira. Horretarako lagun izango ditu José Manuel tifek zuzentzen duen Andra Mari Abesbatza eta Vanessa Goikoetxea sopranoaren eta José Antonio López baritonoaren ahots bakarlariak. Guztiak Josep Caballé Domenech zuzendari kataluniarraren gidaritzapean. Aurreko denboraldian Orkestra Malandain Ballet Biarritz taldearekin batera eszenaratutako Cendrillon ikuskizunaren estreinaldian zuzendu ostean, Caballé Domenech maisua errepertorio sinfoniko-koraleko obra handi bat zuzentzeko izango da oraingoan Orkestraren podiumean. Programa berri hau azaroaren 4 astelehenean abiatuko da Bilboko Euskalduna Jauregian, hilak 5 asteartean Gasteizko Principal Antzokian izango da kontzertua eta, azkenik, azaroaren 7 eta 8an Donostiako Kursaalean izango diren kontzertuekin amaituko da.

Errenteriako Andra Mari Abesbatza, Vanessa Goikoetxea eta José Antonio Lópezek jarriko diote ahotsa denboraldiko estreinako programa sinfoniko-koralari. Partitura garrantzitsu honek ahots gailenak izango ditu. Abesbatzaren zatia José Manuel Tife zuzendari duen Errenteriako Andra Mari Abesbatzaren ardura izango da. Gure herriko abesbatza tradizioan pisu askokoa den talde hau sarritan aritzen a Euskadiko Orkestrarekin lankidetzan, bai kontzertuetan eta baita grabaketetan, azken hauen artean Euskal Konpositoreen Bilduman Aita Donostiari eskainitako diskan, esaterako. Vanessa Goikoetxea sopranoa lehenbiziko aldiz ariko da Euskadiko Orkestraren Abonu Denboraldian eta José Antonio López baritonoa, aldiz, ziklo honetan bueltan da, 2012an Andrey Boreykok zuzenduta Fauré-ren Requiema interpretatu ostean.

Requiem bitxi bat. Brahmsen "Requiem germaniarra" pieza sakroa da, baina bitxia bere generoan, izan ere agnostiko batek egina baita. Konpositorea humanista eta sinestutako eszeptikoa zen, filosfiaren zale eta Schopenhauer-en, ezkortasunaren filosofotzat ezaguna zenaren pentsamenduan interesduna. Horregatik emaitza requiem berezi bat da, harrigarria ere bai. Karl Geiringer musikologoak esandakoaren arabera, Latindar Requiema Azken Juizioaren izugarrikeriek meatxatutako hildakoen aldeko otoitza den bitartean, Brahmsen Requiemak bizidunak sufrimendua eta heriotzarekin adiskidetzeko kontsolamendu hitzak biltzen ditu. Hasiera batean polemika eragin bazuen ere, 1866an sortutako partitura hau errepertorio sinfoniko-koralaren baitan toki nabarmena zuela heldu zen XIX. mende amaierara. Eta egun ere ezinbaztertukoa izaten darrai.

More information