Euskadiko Orkestrak udako gau beroak gogora ekarriko dizkigun egitarau batekin itxiko du denboradia Gasteiz, Iruña eta Bilbon

Euskadiko Orkestra maiatzaren 31 ostegunetik aurrera Gasteizko Principal Antzokian, Iruñeako Baluarten eta Bilboko Euskalduna Jauregian 2011/2012 Abonu-Denboraldia itxiko duen programa porestatzen ari da egunotan. Kursaalean, berriz programa bat gehiago gelditzen da denboraldia amaitzeko. Yan Pascal Tortelier zuzendari dela, "Gauaren berotasunean" izenburupean Udako gau bateko ametsa mendelssohndarraren obertura, Berliozen Les nuits d'été, Sophie Koch mezzosopranoa bakarlari dela, eta Rachmaninoven 2. Sinfonia biltzen dituen egitaraua proposatzen du. Maiatzaren 31an Gasteizen, ekainaren 1 eta 4an Donostian, 5ean Iruñean eta 6an Bilbon.

Mendelssohnen Udako gau bateko ametsa obraren Obertura magiaz bildutako giroak irudikatzen maisutasunez aritzen den konpositore gaztearen geinuaren lehenbiziko aztarna dugu. Eta ondoren, Rachmaninoven Bigarren Sinfonia, Dresdeneko erbestean konpositorea inguratzen zuten ezkortasun eta herriminaren isla.

Sophie Koch mezzosopranoak Berliozen Les nuits d'été (Udako gauak) interpretatuko du Orkestrarekin batera. Orkestrak obra hau interpretatzen duen lehenbiziko aldia da. 1997/1998 denboraldian Royal Opera House Covent Garden ezagunean Siviliako Bizargina operan Rosina eginez debuta egin ostean, Sophie Koch frantziarra mundo mailan panorama lirikoko areto nagusienetan aritu da (Berlin, Milan, Londres, Paris, Tolosa, Brusela, Madril, Zurich, Geneva, Salzburg, Drede eta abar). Udako gauak Berliozen lagun Théophile Gautier-ek idatzitako sei poematan oinarritutako ahots-zikloa da; honetan "ametsak, gauaren misterioa eta maitasunaren enigmak izugarrizko dotoreziaz adierazten dira", egitarauari oharren egile Juan Manuel Vianaren hitzetan.

Yan Pascal Tortelier (Paris, 1949) zuzendari gonbidatu gisa arituko da Euskadiko Orkestraren podiumean. Bere ibilbide luzean zehar Tolosako Orkestraren zuzendari elkartua izan da, zuzendari nagusia Pittsburghen, BBCko Filarmonikoaren titularra Londresen, Londresko Musika Errege Akademiako zuzendari nagusi gonbidatua. Gainera zuzendari gonbidatu gisa munduko orkestra entzutetsuenak zuzendu izan ditu: Londresko Sinfonikoa eta Filarmonikoa, Amsterdameko Concertgebouw, Filarmoniko Txekiarra, San Petersburgo, Milango Scala eta Filadelfiako Filarmonikoak, Boston eta Chicagoko Sinfonikoak, Los Angelesko Filarmonikoa, besteak beste.

Donostian denboraldia ekainaren 14 eta 15eko kontzertuekin amaituko da. Emanaldi hauek Andrés Orozco-Estradak zuzenduko ditu eta bakarlari Leticia Moreno biolinjotzailea arituko da, 2010ean arrakasta handiz debuta egin ostean Orkestraren denboraldira itzuliko dena.