Euskadiko Orkestra Sinfonikoaren 2012/2013 Denboraldia aurkeztu berri da

Eusko Jaurlaritzako Kultura Sailburuorde Antonio Riverak, Orkestraren Zuzendari Nagusi Iñigo Alberdik eta Zuzendari Titular Andrés Orozco-Estradak Euskadiko Orkestra Sinfonikoaren 2012/2013 Denboraldi berriaren gakoak agertu dituzte Orkestraren egoitzan. Sailburuordeak Orkestrak bizi duen garai ona eta publiko berriak erakartzearen alde egindako apostua goraipatu ditu. Gainera, Andrés Orozcori-Estradari Orkestraren titular gisa egindako lan paregabea eskertu dio Eusko Jaurlaritzaren izenean. Iñigo Alberdik bai Abonuan eta baita beste arloetan izango diren proposamen ezberdinen nondik norakoa agertu du, guztiak Orkestraren kalitatearen hobakuntzari zuzenduak. Eta Andrés Orozco-Estradak, 2013ko ekainan titular gisa emandako aldia amaituko duenak, Euskadiko Orkestran emandako epeak bere ibilbidean izan duen garrantzia azpimarratu du eta Orkestrari azken egunera arte etekina aterako diola esan ere.

"Musika irekia" da Euskadiko Orkestra Sinfonikoak Kontzertu Denboraldi berrian barrena abiatzeko aukeratutako leloa. "Musika irekia" lemak Orkestraren nortasunari erantzuten dio: kultur, hezkuntza eta gizarte mailan dituen betekizunei jarraiki, bere musika eremu, formatu eta publiko ezberdinei zabaltzen dien erakundea baita. Bere jarduera nagusi Abonu Denboraldia oinarri harturik, Euskadiko Orkestra eraldatu eta bere musika irekia beste fomatuetan eskaintzeko moldatzen da: Miramongo Matinéeak zikloaren Orkestra da, Musika Gelarena, jada ezaguna den KlasikAT zikloaren Orkestra, Musika Laborategiarena; baita bere kontzertuak sarean eskaintzen dituena; behar bereziak dituzten gizataldeen gizarteratzea ahalbidetzen saiatzen den Orkestra; euskal sorkuntza eta unibertsalaren ondarea gordetzeko berau grabatzen duena; sortzaile berriei lagundu eta bestelako arteekin sinergiak bultzatzen dituen Orkestra; munduan barrena bidaiatu eta musika bere eremuetatik kanpo zabaltzen duena.

Euskadiko Orkestra Sinfonikoa etengabean garatzen ari den espazio zabala da, dinamiko eta berriztatzailea, gertukoa, non proposamen bakoitza, publiko zehatz bati egokitzeko diseinatua, gozatua izateko prest dagoen, eskuragarri. Eta era berean bizikidetzarako ezinbesteko espazioa da, ideiak partekatu eta euskarri ezberdinetan, berariazko zein birtualetan aurkezten diren mezuen elkargunea. Helburua bere musika ahalik eta gehien gizarteratzea da, horretarako norbanakoaren interesei erantzunez. Musika da, beti musika irekia, non gure gizarteko kide bakoitzak bere tokia aurkituko duen. Izan ere, 30 urte dira jada, 3000 emanaldi baino gehiago, 3 milioi entzuletik gora.

More information