“la Caixa” Gizarte Ekintzak Händelen Mesias kontzertu parte-hartzailea Gasteizen aurkeztuko du Euskadiko Orkestraren lankidetzarekin

Euskadiko Orkestra Sinfonikoaren zuzendari nagusi Iñigo Alberdik, "la Caixa"ren negozio arloko zuzendaria Araban, Juan José Ortiz eta "la Caixa" Gizarte Ekintzaren kontzertu parte-hartzailearen koordinatzaile Yolanda Altimirasek Händelen Mesias parte-hartzailea aurkeztu dute. "la Caixa" Gizarte Ekintzak Euskadiko Orkestrarekin lankidetzarekin antolatutako kontzertu hau datorren abenduaren 15ean izango da Gasteizko Principal Antzokian.

Gasteizen estreinako aldiz egingo den"la Caixa" Gizarte Ekintzaren ekimen hau esperientzia aberasgarria izango da bertako koruentzat, amets bat egia bilakatzera gonbidatzen baititu: koru-errepertorioko lan nabarmenenetako bat orkestra eta zuzendari profesionalekin batera abestera, hain zuzen. Agrupación Coral Bleibet, Coro Claustrum Armonicum, Udaberria Gazte Abesbatza eta Samaniego Abesbatzako kide diren 110 abeslari amateur inguruk esku hartuko dute kontzertu honetan. Guztiek asteburuetan prestatzaile batekin lan egiten dute jada, obrak zuzendariarekin entseatu aurretik. Abenduaren 15eko emanaldian 110 abeslariak eserleku-patioan eta plateetan kokatuko dira, honek entzulegoarengan estereo moduko entzunaldi-efektua eragingo duelarik.

Philip Pickett zuzendari ospetsuaren gidaritzapean, 110 abeslariez gain, Errenteriako Andra Mari Abesbatzak agertokitik jardungo du, Malin Christensson sopranoak, Catherine Hopper kontraltoak, Ed Lyon tenoreak eta Roderick Williams baxuak osatutako bakarlari-talde nabarmenarekin batera.

"la Caixa" Gizarte Ekintzak hamabost urte baino gehiagoan sustatutako kontzertu parte-hartzaileek proiektu pedagogiko garrantzitsu batean eta munta handiko musika-ikuskizunean parte hartzeko aukera eskaintzen die musikaren zaleei, nazioartean prestigio handia duten musikari eta interprete profesionalekin batera. Tradiziozkoa den Händelen Mesiasi beste lan batzuk gehitu dizkio "la Caixa" Gizarte Ekintzak azken urteetan, esate baterako Carl Orffen Carmina Burana eta Mozarten Requiema eta Koroatzeko meza. 1995az geroztik 24.000tik gora parte-hartzailek abestu dituzte lan programatuen alderdi koralak, eta 235.000 pertsona inguru joan dira Espainiako hainbat hiritan egin diren kontzertuetara, besteak beste Madril, Bartzelona, Valentzia, Sevilla, Zaragoza, Palma Mallorcakoa, Santiago, Donostia, Tenerife eta Valladoliden egin direnetara.