NEMESIS HIRUKOTEAK BRUCH, BRAHMS ETA NINO ROTAREN TRIOAK INTERPRETATUKO DITUZTE LARUNBAT HONETAKO MIRAMONGO MATINÉEAN

Larunbat honetan, hilak 15, Miramongo Matinéeak zikloaren denboraldiko emanladi berri bat izango da Orkestraren egoitzan. Juan Navarro eta Gabriel Mesado, hurrenez hurren Euskadiko Orkestrako klarinete eta biolontxelo bakarlariek eta Javier Pérez de Azpeitia piano-jotzaileak instrumentu-multzo honetarako bi konpositore adinkidek idatzitako obrak interpretatuko dituzte, Bruch eta Brahmsenak, hain zuzen ere. Gainera, erregistroa aldatuz, egitaraua ziklo honen ezaugarrietako bat den zinemarako musikara hurbilduz osotuko da: Federico Fellini, Luchino Visconti, Franco Zeffirelli edo Francis Ford Coppolaren filmatarako musika idatzi zuen Nino Rotaren trio bat interpretatuko dute.

Kontzertuari hasiera emateko, bere Biolinerako kontzertuak famatu egin zuen Max Bruch konpositore alemaniarrak klarinete, biola edo biolontxelo eta pianorako idatzitako zortzi piezatatik bi interpretatuko ditu Némesis-ek. Bere garaiko gainerako musikagileek modernismoarekin saiakuntzak egiten zituzten bitartean, bere ekoizpen musikal guztiak islatzen duen espiritu erromantikoari leial izan zitzaion Bruch.

Ondoren, Brahmsen Klarinete, biolontxelo eta pianorako trioa la minorrean izango da entzungai. Bere azken aroan konposatutako lau ganbara-musika obretan, Brahmsek klarinetea aukeratu zuen protagonista gisa, zuren familiako abeslari melankoliko eta gozo samarra. Konpositore honen trioaren espiritua heldutasunezko bere obrena baino astunago eta ilunagoa da. Behar bada, hauetan asmakuntza ez da hain fresko eta joria, baina maisutasun teknikoa ondorengoetan bezain nabarmena da.

Oso bestelakoa da, bai ikuskera eta baita estilo aldetik ere, Nino Rotak instrumentu-talde berdinerako sortutako Trioa. Nino Rota konpositorea zinemarekiko izan zuen loturagatik da ezagunagoa, batez ere italiar zinemaren urrezko aroarekin; izan ere, garai hartan Nino Rotak harreman estua izan zuen Federico Fellini zuzendari handiarekin. Bere egiturari dagokionez, klasikoa da, soilagoa iraupenari eta baliabideei dagokionez, baina ez eraginkortasun eta dizdirari dagokionean.

Kontzertu honetarako sarrerak Servikutxa, Telekutxa (943 00 12 00), www.kutxa.net eta www.euskadikoorkestra.es helbideetan eskura daitezke, eta baita Egoitzaren leihatilan, kontzertu egunean 10:30etatik aurrera. Halaber, doako autobus zerbitzua dago Miramongo Egoitzera etortzeko, 10:25etan Gipuzkoako Plazako 4.zenbakitik atera eta Antso Jakituna Hiribideko 18. zkian eta Madrilgo Hiribideko 34.ean geldialdiak egiten dituelarik.